2005 تحت الأضواء

قراءة سياسية ساخرة لأحوال عام مضى

يا فتاح يا عليم يا رزاق يا كريم .. نبتدي 2005 ازاي .. نبتدي ازاي .. مفيش احلى من كدة بداية
19 يناير
الفتى المدلل ... المعجزة .. ايوة اسمه كده .. اتحكم على رجل وزارة الزراعة القوى .. يوسف عبد الرحمن .. بـ 10 سنين سجن .. فى قضيتين .. (الرشوة والمبيدات ) .. يا بلاش .. يعنى التهمة الواحدة واقفة بكام على كده .. واقفة من غير فصال .. وحسب مقاييس البورصة المصرية .. بـ 5 سنين بس..ه
29 يناير
انها العدالة السريعة .. أيها الأخوة المواطنون .. مش بس كده .. لأ وتنفيذ إجراءات فى سرعة وسهولة ويسر .. أمال ايه .. احنا فى عصر اللاب توب والحكومة الالكترونية .. نحن نتحدث عن رفع الحصانة عن أيمن نور .. والقبض عليه على باب مجلس الشعب .. فى أسرع سابقة من نوعها ..ه

30 يناير
تانى يوم مباشرة ، حركة تمويه رائعة .. محدش خد باله منها خالص .. تصدقوا الرئيس فى تصريح رسمي .. يعلن: أي تعديل للدستور غير وراد فى المرحلة القادمة !!!! .. ايه الحلاوة دي .. ده بيرقص فى التمنتاشر وبيجيب جون .. ف الشعب كله !!..ه
2 فبراير
حى مدينة نصر .. يعاني من انقطاع المياه لمدة طويلة .. عادي .. على فكرة ، بتحصل ف كل حتة ف العالم .. دي يا جماعة ظاهرة عالمية .. زى الارهاب كده .. وأنا حذرت منها كتير .. محدش سمع كلامى ..!!ه
15 فبراير
تبديل وزراى محدود .. وزير الاعلام يحل محل وزير الشباب .. والعكس ، دي أساسا .. كانت أوفسايد .. بس الحكم حسبها جون !! .. أصله واخد رشوة .. حتة أرض ف أكتوبر .. قبل الماتش ..ه
26 فبراير
يوم تاريخي فى حياة الكورة المصرية .. قصدي السياسة المصرية .. إنه تعديل المادة 76 من الدستور ، مش قادر أتكلم أكتر من كده .. أصل اليوم كان طويل شوية ..ه
27 مارس
أحمد زكى عبد الرحمن ( النمر الأسود – ناصر 56 – أيام السادات – حليم ) .. "إنا لله وإنا إليه راجعون " .. أقروا له الفاتحة ..ه 7 أبريل
طالب هندسة يفجر نفسه فى منطقة الأزهر .. ايوه !!. حادث فردى .. مختل عقليا .. زى ما قالت الداخلية .. مش عايز حد يسبق الأحداث .. ويقوللي طب اللى حصل فى شرم الشيخ .. احنا لسه ف أبريل وتفجيرات شرم الشيخ كانت فى يونية !!!..ه
25 مايو

يوم تاريخي جديد .. بس المرة دي .. فى حياة المرأة المصرية .. لأول مرة .. البلد بتاعتنا تتقدم .. وتبقى زى أوروبا وامريكا .. تحرش جنسي .. وهتك عرض .. ف الشارع .. وعلى عينك يا تاجر .. ويا داخلية .. ويا وكالات الأنباء .. ويا كاميرات الفضائيات .. إنه يوم الاستفتاء العظيم ..ه
23 يونية

أهو يا فالح .. حادث فردي تاني .. تفجيرات شرم الشيخ .. فردي ؟؟ .. ولا مش فردي ؟!!.. الحاقدين والمغرضين ومروجى الشائعات وأعداء الوطن ولاد الـ ..... ، بيقولوا عليه مش (فردي) !!! .. بيقولوا (زوجي) ..!!ه
7 يوليو
يوم تاريخي جديد .. بس المرة دي .. فى حياة الكرامة المصرية .. وفى صحة وتحت رعاية الخارجية المصرية .. اغتيال السفير ايهاب الشريف فى العراق .. أصل هوه اللى غلطان !! .. مش لو كان راح السعودية .. كان زمان الكفيل خد له حقه من اللى خطفوه ودبحوه !!..ه
9 سبتمبر
اعلان النتيجه ف أول انتخابات رئاسية متعددة الاستخدامات .. دي بأه مش محتاجة تعليق .. مصر كلها كانت عارفة النتيجة من الكنترول قبلها .. بس المفاجأة أن أيمن نور .. طلع عنده ملحق !!! .. أصله طلع قبل الأخير .. (التانى يعني)..ه
21 أكتوبر
أحداث الفتنة بالاسكندرية .. مش عارف اليوم ده بالذات .. التليفزيون المصري كان بيعرض فيلمين ف وقت واحد على قناتين مختلفتين .. (طيور الظلام – المصير ) .. بس خلاص ..ه
9 نوفمبر

انتخابات الأستاذ "سيد أراره" الشهير بمجلس الشعب .. النتيجة بعد إعادات وبلطجة وتزوير .. وقلة أدب ، سقوط أغلب رموز المعارضة المحترمة ، حصول الاخوان على 88 مقعد ، حصول الحزب الوطنى على الأغلبية المطلوبة ..ه
التعليق: إلى مكتب المرشد العام .. نشكركم على حسن تعاونكم معنا .. التوقيع .. لجنة السياسات .. تصفيق حاد للاتنين ..ه
25 ديسمبر

نتيجة ملحق الانتخابات الرئاسية .. الخاص بالسيد / أيمن نور .. معلش أتأخرت شوية علشان كان فيه انتخابات الأستاذ (سيد ...) .. الحكم بـ 5 سنوات حبس .. للسيد / أيمن .. فى قضية التوكيلات المزورة .. (الرقم خمسة ده مش بيفكركم بحاجة ؟؟!!.. راجعوا معايا يوم 19 يناير كده )..ه
27 ديسمبر
وزراة جديدة (لانج) .. برياسة (نظيف) .. وكلها (جمال) .. أشهر من خرج من الوزارة .. كمال الشاذلي ، ابراهيم سليمان .. تقول الشائعات .. ان البلد حدثت بها أزمة قلل وأزيار (جمع زير ) فى هذا اليوم ..!! .. أما أشهر من دخل برجله اليمين الوزارة .. فقط بعض الأصدقاء وباقى العائلة والشركاء للوزرا القدام ..ه
29 ديسمبر
وكان بحق .. ختامها مسك .. إذ أنه بناء على توجيهات من وزارة البيئة .. تم القضاء نهائيا .. على بؤرة هامة من بؤر التلوث السمعي والبصري والهوائي والأرضي .. فى أحد ميادين القاهرة .. وذلك بالتعاون مع وزارتى الداخلية والخارجية .. إنها عملية -الفجر الساطع- ضد العدو السودانى الغاشم .. المغتصب لأرض ميدان مصطفى محمود!!!!ه
ولا أراكم الله مكروها فى 2005 لديكم .. العزاء تلغرافيا : أي مكان ف مصر .. مش مهم !!..ه

محاولة للكتابة

الحب .. الحرية .. السلام

لو بيدي

لجعلتها الديانات الثلاث

فكلها .. تؤدي إلى الله

----------------

الحقيقة .. سلك كهرباء

لا ندرك خطورته إلا بعد لمسه عاريا !!ه

--------------------

الحب .. كلمه في العربية

احتار في معناها.. كل من يتحدث العربية ..!!ه

------------------------------

سألت الورقة القلم: لماذا تكتب فوقي مادمت تمزقني بعد ذلك؟

رد عليها: لعل أحدا يعترف .. أني كنت يوما أملك حريتي!!ه

-------------------

في هذا العالم .. لكي تصل

لا تحاول النظر لأسفل ..ه

سيرهقك كثيرا .. إحصاء عدد الجماجم

التي ستدوس عليها..!!ه

-------------------

بحثت كثيرا عن كلمات..ه

تصلح أن تكون لكِ إهداء

فلم أجد سوى

أن الكتابة هي

رابع الديانات

نحتاج إلى القهوة المرة

سبتمبر 1998

واحد من أصعب أيامي

بعد لحظات من الخبر-الصدمة

وفاة أجمل وأرق وأحن انسانه قابلتها

فى عملية جراحية

-------------------------

كان الله حنونا فى غرفة العمليات

فلم أبك الوحدة

كان الله حنونا بعد الوحدة

فلم أبك أحدا ..ه

-------

كلما حاصرتني الشوارع

أهرب فى ركن عينيك

وأشتاقك أكثر..ه

-------

حين يكون الله قريبا من وجعك

سأغافلك قليلا .. وأحب الله

أحيانا..ه

نحتاج إلى القهوة المرة

لكى نستطيع أن نعيش

--------------------

أشعار: أمـل جمـال

جيفـــــارا

إنني أحس على وجهي بألم كل صفعة تُوجّه إلى مظلوم في هذه الدنيا، فأينما وجد الظلم فذاك هو وطني
............
الثورة قوية كالفولاذ، حمراء كالجمر، باقية كالسنديان، عميقة كحبنا الوحشي للوطن لا يهمني اين و متى ساموت بقدر ما يهمني ان يبقى الوطن
............
الثوار يملئون العالم ضجيجا كي لا ينام العالم بثقله على أجساد الفقراء
............
الطريق مظلم و حالك فاذا لم تحترق أنت وأنا فمن سينير الطريق؟
............

لن يكون لدينا ما نحيا من أجله .. إن لم نكن على استعداد أن نموت من أجله

"أرنستو تشى جيفارا"