Saturday, June 10, 2006

أنــا حـــر .. 2

وزير الصحة يعقد مؤتمرا صحفيا .. وزير الصحة ينفى الاتهامات الباطلة التى وجهت له .. وزير الصحة يقول .. أنه لم يضربها .. لقد دفعها فقط بعيدا عنه .. بعد أن استفزته .. وزير الصحة برئ .. برئ براءة ممدوح اسماعيل .. من دم ضحايا العبّارة .. يا اخوانا .. وزير الصحة .. برئ .. برئ .. لم يضرب الصحفية .. لم يقترب منها حتى .. وهذا التحقيق الجاري بشأن الواقعة .. هو باطل .. باطل .. وهذه الرسوم الكاريكاتورية والمقالات الحادة العنيفة .. هى ابتزاز سياسي .. من الصحافة الصفراء الحقيرة والمتعفنة .. عذرا أعزائي .. حدث هذا بالضبط .. وبالحرف الواحد .. فى الجزائر !!! .. نعم .. وزير الصحة هناك متهم بضرب صحفية من جريدة (ليبرتي) .. والمرة الجاية هايضرب الصحفيين بالنار ..!!فعلا .. اللى يشوف بلاوى الناس تهون عليه بلوته .. المفروض .. نبعت نجيب الوزرا الجزائريين .. ياخدوا دورة تدريبية عندنا .. فى فنون التعامل مع الصحفيين والإعلاميين .. ايه الهبل ده ؟؟ .. وزير بنفسه .. يقوم يقف ويقل مقامه .. ويضرب صحفية !!! .. معقول ده ؟؟!! .. مفيش هناك بلطجية يعملوا الواجب مع الصحفيين ف الشارع !!.. مفيش حد يخطف صحفي ويظبطه ف الصحراء ويقلّعه هدومه !!.. لا .. لا ..لا .. وبعدين إيه يا خويا الحملة اللى عاملاها الصحافة الجزائرية دي ضد الوزير .. يا إخوانا احمدوا ربنا .. ايه انتوا ما جيتوش مصر زيارة قبل كده ولا إيه؟ .. اللى بعده .. يحكى أن .. المركز القومي للبحوث (المصري المرة دي) ..على لسان مقرر لجنة الإعلام .. أعلن عن اكتشاف مهم .. ويقوم بعقد ندوة علمية هامة .. عن .. ... القبلة .. أه والله .. وبيقولك إن خبراء المركز .. توصلوا إلى أن القبلة .. القبلة !! .. أصبحت خطر على صحة الناس .. وتنقل العديد من الأمراض .. ويحذرون تحذيرا كبيرا من انتشارها بين المصريين بلا داع .. مما يعرضهم لتفشي الأمراض المعدية ..!!عندي استفسار للسادة خبراء المركز القومي "للبوس" .. قصدي البحوث ..هيا توصيات الندوة طلعت ولا لسه؟؟ وحياة أبوكم لو كانت لسه .. ابقوا ضيفوا عليها .. نظرا لأننا شعب مش عارف مصلحته ومش بيخاف على صحته .. يجب تطبيق غرامة فورية (زى المترو كده) .. على كل اللى يسلم على صاحبه ويبوسه ف الشارع .. وبالنسبة للسيدات والبنات .. الغرامة تكون مضاعفة .. علشان هما بيبوسوا بعض كتير .. وبكده نحافظ على صحة المصريين .. وننعش خزينة الدولة شوية .. وبالنسبة لموضوع البوس فى الأماكن المغلقة .. دى مشكلة كبيرة .. ومش هانقدر نسيطر عليها .. فلازم نعمل حملة قومية .. تحت رعاية أي حد .. (ما تودوناش ف داهية) .. وممكن نخلي شعارها ..( أحبك آه .. أبوسك لا ).. أو .. (اوعى تبوس الواوا) ..كما يجب التركيز على إذاعة الأغاني التى تحرض المواطنين على عدم "البوس" .. زى "بلاش تبوسني ف عنيا" ..وكذلك .. منع أي قبلات فى الأفلام .. وطبعا فى الأوتوبيسات المكيفة كمان!! .. نيجي بأه لأخطر نقطة فى الموضوع ده .. ركزوا معايا كويس .. علشان دي حاجة تخص الأمن القومي بتاع البلد .. لما هانيجي نعمل استقبال رسمي لأحد السادة أصحاب الجلالة أو السمو أو الفخامة ملوك وأمراء ورؤساء الدول الشقيقة .. وينزلوا سيادتهم من الطائرة الخاصة .. هانعمل ايه ؟؟!! .. طبعا .. دي حالة خاصة .. ونظرا لحساسيتها الشديدة وخطورتها على الأمن القومي .. فلازم نستثنى الحكاية دي من الحملة .. محدش يقول اشمعنى .. ده مش علشان حد .. ده علشان مصر .. وكويس أن "ياسر عرفات" ربنا افتكره ..آخر حاجة قبل ما نمشي .. في أسبوع واحد غريب وزحمة وحر .. خبرين ف الراس يوجعوا .. حكم محكمة استئناف القاهرة (الدائرة 100 أحوال شخصية) بإثبات نسب الطفلة لينا إلى .. أحمد الفيشاوي .. التعليق: سمعونا .. "الراجل الندل .. ونعم الرجال" .. إهداء خاص من لينا هند الحناوى – كما أحب أن أسميها - إلى (..............) ولاّ بلاش .. أنتوا عارفين مين ..و .... حجاب الفنانة القديرة اللى ما خدتش دور سعاد حسني!! .. "حنان ترك" .. التعليق: ربنا يهدي ..

Friday, June 09, 2006

أنــا حــر .. 1

نبتدي منين المرة دي .. نبتدي منين؟؟!!!!ه .. أيوة .. مفيش أحلى من كده بداية .. مليار جنيه .. هى حصيلة ما أنفقه المصريون سنويا على هذه الأمور الحيوية والهامة للغاية ..على الترتيب ..الدجل والشعوذة .. صناديق النذور .. المخدرات .. وأخيرا .. السجائر .. خلال 2005 فقط ..حسب تقرير الأجهزة الحكومية .. يبدو أننا سنضطر إلى مطالبة الحكومة النظيفية بزيادة بندين جديدين فى الميزانية العامة للدولة يضافا إلى شقيقهما بند السهو والخطأ .. البند الجديد الأول المقترح يمكن أن يسمى .. بند الهبل!! .. ويختص بالصرف على الدجل والشعوذة وصناديق النذور .. والبند الجديد الثاني .. سيحمل اسم .. بند المزاج والكيف .. ويدخل فى نطاقه .. المخدرات والسجائر ..!!!ه .. أتذكرون المشهد الجميل لمحمود عبد العزيز ويحيى الفخرانى فى (الكيف) ..ه
انت جاي تعزى ولا تهرج ؟؟ -
يحيي (وهو غارق فى الضحك من تأثير التركيبة المخدرة): - لأ أنا جاي أهرج ..!!!ه
بالتأكيد وفى الواقع .. انا عندما قرأت الخبر ونويت الكتابة لكم عنه لم أكن جاي علشان أكتب .. أنا جاي أهرج .. !! صحيح إنه ضحك كالبكاء .. ندخل على النكتة الثانية .. إحدى المؤسسات التعليمية الخاصة الشهيرة جدا .. قررت منح الطلاب والموظفين كلهم إجازة رسمية مدفوعة الأجر .. يوم 30 أبريل الماضي .. بالطبع هم أحرار .. فلوسهم وهم أحرار فيها .. لكن أن تسمى هذه الأجازة العبقرية .. وقفة عيد العمال!!!.. فهذه بحق هى أفضل نكتة سمعتها هذا الأسبوع .. وهكذا ، فقد مثلت هذه التجربة الرائدة والفريدة من نوعها .. اختراعا جديدا يضاف إلى قائمة اختراعات العبقرية المصرية الوظيفية .. ه
وبما أننا .. اون لاين .. فلا بد من الاحتفال الخاص بموضوع هام جدا يخص جامعاتنا العريقة .. ماذا لو .. تفضلتم أعزائي القراء .. بزيارة أحد المواقع الالكترونية الخاصة بأي جامعة مصرية عريقة .. ماذا ستجدون ؟؟ .. أقولكم أنا وأوفر عليكم التعب والمجهود و ... الصدمة .. باختصار .. كل ما يمكن أن تجدوه هو .. شعار الجامعة .. وشوية صور على الصفحة الرئيسية لمبانى الكليات والأسوار والأشجار اللى ف الجامعة ..!! بالإضافة إلى .. بعض صفحات داخلية بتشتغل هى .. أسماء السادة الدكاترة أعضاء مجلس الجامعة الكرام .. وعرض لأسماء الكليات وعمدائها المبجلين .. ثم لا شئ .. باقى الصفحات (واقعه) .. لا تعمل .. وللإنصاف .. فى أوقات النتائج .. يمكنك أحيانا الإطلاع على النتيجة .. وعلى فكرة .. لو حاولت البحث عن أي دراسات أو أبحاث أو حتى صفحة تخص أي مكتبة أكاديمية داخل الجامعة .. فالأفضل أن تخطف رجلك وتروح للمكتبة نفسها أسهل وأرحم من حرقة الدم أدام الشاشة ..ه
نبطل غم ونكد بأه .. وندخل على خبر حلو ومثير .. هيفاء وهبي (اللى هايعمل عبيط ومش عارفها يقوم من أدام الشاشة حالا) .. اختارت مجلة "بيبول" الأمريكية .. (هيفا) .. ضمن قائمة أجمل 100 إمرأه فى العالم .. وقالت عنها .. "تلقب في الشرق الأوسط أنها أكثر النساء أنوثة ، ملامحها عربية شرقية مثيرة ، تحرص دائما على إظهار جمال عينيها بمكياج ثقيل"..لا تعليق .. وهكذا وصل العرب فى مجال الجمال للعالمية والمصريين بالمرة .. مش (هيفا) عندها حد من العيلة مصري!! (مامتها) من المنصورة باين!! .. المفروض نعمل اليوم ده عيد قومى للمنصورة .. وبالمرة اليوم اللى قبله يبقى برضه أجازة علشان هايكون الوقفة !!!!ه
كفاية تهريج بأه .. نتكلم جد شوية .. بعد التجديد الميمون لقانون الطوارئ .. (استر يا رب) .. قوم ايه .. صجينا م النوم .. ف يوم .. لقينا كل جدران القاهرة المحروسة .. مفروشة بغزارة بوسترات ملونة وشكلها حلو .. فيها صورة حلوة .. ومكتوب عليها .. الإسلام هو الحل .. لا لقانون الطوارئ .. والتوقيع تحت .. الإخوان المسلمون .. عادي .. وبعدين قوم ايه .. تاني يوم .. لقينا نفس البوسترات اللى شكلها مصروف عليها جامد .. ملطخة جميعها بالسواد .. بس باينه يعني برضه .. هوه فيه ايه ؟؟؟ يبدو أن شهر العسل قد انتهى مبكرا بينهم .. طب اتفقوا مع بعض .. ووفروا الفلوس دي .. ممكن تعملوا مشروع مشترك بين الحكومة والإخوان وتشغلوا الشباب العاطل.. أو أقولكم اديوهالي وأنا أعملكم مشروع هايل ..ه
آخر لقطة .. "شفرة دافنشي" .. في افتتاح مهرجان (كان) .. يا ترى هاييجي مصر امتى ؟؟؟؟ه
وهايتعرض ف كام دار عرض ولمدة أد إيه؟؟؟؟؟!!!!!ه

About Me

My photo
just a human, seeking for real life, real love, real freedom.